Marwolaeth parafeddyg o Bwllheli Robin Parry Jones

MAE Gwasanaethau Ambiwlans Cymru wedi talu teyrnged i barafeddyg hoffus a hirhoedlog a fu farw mewn damwain dros nos.

Ymunodd Robin Parry Jones, a leolwyd yng Ngorsaf Ambiwlans Pwllheli, â Gwasanaethau Ambiwlans Cymru ym mis Tachwedd 2000, gan ddechrau ei yrfa gyda Gwasanaeth Cludo Cleifion Di-argyfwng yr Ymddiriedolaeth.

Cymhwysodd yn ddiweddarach fel Technegydd Ambiwlans dan Hyfforddiant yn 2002 a Pharafeddyg yn 2005.

Cymaint oedd ei ymrwymiad i wasanaethu pobl Cymru, roedd Robin hefyd yn Arweinydd Tîm Ymatebwyr Cyntaf Cymunedol ym Mhen Llŷn, lle bu’n cefnogi tîm mawr o wirfoddolwyr.

Yn anffodus, bu farw Robin mewn damwain dros nos (dydd Iau 23 Mehefin 2022).

Dywedodd Jason Killens, Prif Weithredwr Gwasanaethau Ambiwlans Cymru: “Roedd Robin yn berson uchel ei barch, cariadus a hapus-go-lwcus a oedd yn adnabyddus iawn yng nghymuned Pwllheli.

“Roedd yn un o 'hyrwyddwyr' Ymatebwyr Cyntaf y Gymuned gwreiddiol, eiriolwr gwirioneddol dros wirfoddolwyr a ddaeth yn gyswllt annatod rhwng gwirfoddolwyr a gorsafoedd lleol.

“Roedd gan Robin, a oedd yn wreiddiol o Gaernarfon, angerdd gwirioneddol dros wydnwch cymunedol, ac mae ei ymrwymiad i gefnogi gwirfoddolwyr yn ei amser ei hun yn adlewyrchiad o’i gymeriad.

“Yn ei amser hamdden, roedd Robin yn bysgotwr brwd ac yn aelod o’r gymuned saethu leol gyda’i gydweithwyr o Bwllheli.

“Yn daid balch, roedd Robin hefyd yn hoff iawn o gŵn ac roedd wedi dechrau gwasanaeth trin cŵn yn lleol.

“Bydd colled sydyn a thrist Robin yn cael ei deimlo gan bawb oedd yn ei adnabod, a hoffem estyn ein cydymdeimlad dwysaf i deulu, ffrindiau a chydweithwyr Robin ar yr adeg anodd hon.

“Bydd hwn yn gyfnod arbennig o anodd i gydweithwyr gweithredol ym Mhwllheli, a gollodd y parafeddyg Anthony Stephens y llynedd, ac yn 2016, John Clift o’r Gwasanaeth Cludo Cleifion Di-argyfwng.

“Mae pob un ohonom ni yng Ngwasanaethau Ambiwlans Cymru yn gweithio bob dydd i gyfrannu at yr ymdrech i achub bywydau, ond allwn ni byth fod yn ddigon parod o ran cynorthwyo’r rhai rydyn ni agosaf atynt.”

Nodiadau y Golygydd
I gael rhagor o wybodaeth, anfonwch e-bost at y Pennaeth Cyfathrebu Lois.Hough@wales.nhs.uk