Yr Ymddiriedolaeth yn penodi dau Gyfarwyddwr Anweithredol newydd

Component has been removed through translation. Check with originating site of what this should be. MAE Gwasanaethau Ambiwlans Cymru wedi penodi dau Gyfarwyddwr Anweithredol newydd i’w Fwrdd.

Dechreuodd Ceri Jackson, sydd wedi dal nifer o uwch rolau yn y sector elusennol, a Hannah Rowan (Burch gynt) sydd hefyd ag wyth mlynedd o brofiad yn y trydydd sector ar ôl dechrau ei gyrfa fel athrawes, yn eu swyddi ar 01 Ebrill 2022. .

Dros y flwyddyn ddiwethaf mae Ceri, sy'n byw yng Nghaerdydd, wedi bod yn Gyfarwyddwr Anweithredol dros dro i'r Ymddiriedolaeth ac mae hefyd yn Gyfarwyddwr Anweithredol i'r Gymdeithas Strôc a Sight Life.

Meddai: “Rwy’n falch iawn o gael ymuno â Bwrdd WAST fel Cyfarwyddwr Anweithredol ar ôl blwyddyn yn y rôl interim.

“Rwyf wedi mwynhau’r her yn fawr ac yn gyffrous i helpu i lunio dyfodol y sefydliad balch hwn wrth iddo geisio trawsnewid gwasanaethau ledled Cymru.”

Roedd Ceri yn Gyfarwyddwr Strategaeth a Thrawsnewid Dros Dro yn hosbis plant Tŷ Hafan tan 2020, ac mae wedi gweithio’n flaenorol fel Cyfarwyddwr a Phennaeth Cymunedol Sefydliad Cenedlaethol Brenhinol Pobl Ddall (RNIB).

Mae hi eisoes wedi eistedd ar sawl Bwrdd yng Nghymru er mwyn helpu i adolygu polisi ac ymarfer ar draws ystod o feysydd, gan gynnwys iechyd, gofal cymdeithasol a thai.

Mae Hannah, sydd hefyd yn hanu o Gaerdydd, ar hyn o bryd yn Rheolwr Newid ar gyfer Cyngor ar Bopeth ac mae hefyd yn Gyfarwyddwr Anweithredol ar gyfer Cymwysterau Cymru, sef y rheoleiddiwr ar gyfer yr holl gymwysterau nad ydynt yn raddau yng Nghymru.

Component has been removed through translation. Check with originating site of what this should be. Mae gan Hannah gefndir fel hyfforddwr busnes ac mae'n arbenigo mewn datrys problemau lefel uchel a throsolwg strategol.

Dywedodd: “Rwy’n eiriolwr brwd dros gydraddoldeb, amrywiaeth a chynhwysiant a’r effaith gadarnhaol y gall hyn ei chael ar ddiwylliant a pherfformiad sefydliad.

“Mae’n anrhydedd cael ymuno â’r Bwrdd yn rôl Cyfarwyddwr Anweithredol ac rwy’n edrych ymlaen at weithio gyda chydweithwyr yn yr Ymddiriedolaeth.”

Dywedodd Martin Woodford, Cadeirydd Gwasanaethau Ambiwlans Cymru: “Rydym wrth ein bodd bod Ceri a Hannah yn ymuno â ni ar y Bwrdd.

“Maen nhw’n dod â chyfoeth o brofiad a mewnwelediad strategol gyda nhw a fydd yn hollbwysig i’r Ymddiriedolaeth wrth i ni lywio newid yn y cyfnod ôl-bandemig hwn.

“Rwy’n gwybod y bydd cydweithwyr yn ymuno â mi i estyn croeso cynnes iawn i’r ddau ac edrychaf ymlaen at y cyfraniadau y byddant yn eu gwneud i’n datblygiad.”

Mae Bwrdd yr Ymddiriedolaeth yn cynnwys y Cadeirydd a'r Cyfarwyddwyr Anweithredol, y Prif Weithredwr a'r Cyfarwyddwyr Gweithredol yn ogystal â phartneriaid Undebau Llafur, sydd oll yn gweithio ar y cyd fel y Bwrdd.

Penodir Cyfarwyddwyr Anweithredol am gyfnod penodol gan y Gweinidog Iechyd ac maent yn dod ag annibyniaeth barn, amrywiaeth cefndir ac ystod eang o sgiliau ac arbenigedd o'r sector cyhoeddus, y trydydd sector a'r sector preifat i'r Bwrdd.

Maent yn gweithio gyda Chyfarwyddwyr Gweithredol i ddatblygu strategaeth, polisi a sicrhau llywodraethu cadarn, a sicrhau bod yr Ymddiriedolaeth yn darparu gwasanaethau ac yn perfformio'n effeithiol ar lefel strategol a gweithredol.