Arhoswch yn ddiogel a mwynhewch Noson Tân Gwyllt ddisglair
MAE Gwasanaeth Ambiwlans Cymru yn annog pobl i gadw'n ddiogel y Noson Tân Gwyllt hon.
Mae Noson Tân Gwyllt yn draddodiadol yn gyfnod prysur i’r gwasanaeth, gyda galwadau tân gwyllt a choelcerth ychwanegol yn ychwanegu at nifer y digwyddiadau y mae criwiau a thrinwyr galwadau yn delio â nhw.
Y llynedd, derbyniodd yr Ymddiriedolaeth 3,433 o alwadau i 999 dros gyfnod Noson Tân Gwyllt ac 8,159 o alwadau difrys pellach i GIG 111 Cymru.
Gall llosgiadau ac anadlu mwg o dân gwyllt a choelcerthi fod yn ddifrifol, yn enwedig i'r rhai sydd â chyflyrau anadlol fel asthma.
Dywedodd Judith Bryce, Cyfarwyddwr Cynorthwyol Gweithrediadau’r Ymddiriedolaeth (Gweithrediadau a Chymorth Cenedlaethol): “Ar noson o bwysau mawr i’r holl wasanaethau brys ledled Cymru, rydym yn annog y cyhoedd i helpu i ddiogelu eu hunain, eu teuluoedd, cymdogion a ffrindiau drwy aros yn ddiogel a pheidio â chymryd risgiau.”
Gellir osgoi anafiadau llosgiadau, yn arbennig, trwy ddilyn y cod Tân Gwyllt.
Os byddwch yn dioddef llosg, gwnewch yn siŵr eich bod yn gwneud y canlynol:
- Cael y person i ffwrdd o'r ffynhonnell wres.
- Oeri’r llosg gyda dŵr llugoer neu oer am 20 munud.
- Tynnu i ffwrdd unrhyw ddillad neu emwaith sydd ger y man llosg.
- Gwneud yn siŵr bod y person yn cadw'n gynnes.
- Gorchuddio’r llosg gan ddefnyddio cling ffilm neu fag plastig glân.
- Defnyddio poenladdwyr fel paracetamol neu ibuprofen.
- Mynd i dudalen Llosgiadau a sgaldiadau ar wefan GIG 111 Cymru.
- Defnyddio’r adran achosion brys ar gyfer trawma, anafiadau neu salwch difrifol.
- Dim ond ar gyfer argyfyngau difrifol neu rai sy'n bygwth bywyd y dylech ffonio 999.
Dyma rai nodiadau atgoffa diogelwch hanfodol ar gyfer Noson Tân Gwyllt ddiogel a phleserus:
Dewiswch arddangosfeydd proffesiynol
Dewiswch fynychu arddangosfeydd tân gwyllt a drefnir yn broffesiynol, gan eu bod yn opsiwn mwy diogel i bawb.
Cynghorion rheoli asthma
Cariwch eich anadlydd i fynd i'r afael yn gyflym ag unrhyw symptomau asthma a achosir gan aer myglyd.
Sicrhewch fod y bobl o’ch cwmpas yn ymwybodol o beth i'w wneud a phryd i ofyn am gymorth os bydd eich symptomau asthma yn gwaethygu.
Cadwch bellter diogel oddi wrth y goelcerth a byddwch yn ymwybodol o gyfeiriad y gwynt er mwyn osgoi effeithiau anadlu mwg gormodol.
Defnyddiwch sgarff i orchuddio'ch ceg a'ch trwyn mewn tywydd oer, gan helpu i gynhesu'r aer cyn ei anadlu i mewn.
Ystyriwch aros y tu fewn os yw tân gwyllt wedi achosi eich asthma yn flaenorol, yn enwedig os yw ansawdd yr aer yn wael.
I gael cyngor ychwanegol ar reoli asthma a chadw’n ddiogel yn ystod arddangosfeydd tân gwyllt, ewch i’r dudalen Asthma ar wefan GIG 111 Cymru.
Parchwch weithwyr brys
Dangoswch barch ac ystyriaeth i weithwyr brys ar Noson Tân Gwyllt, gan gydnabod eu hymroddiad i sicrhau diogelwch y cyhoedd.
Dywedodd Judith: “Rydym yn gwybod bod galwadau i’r gwasanaethau brys yn cynyddu o gwmpas Noson Tân Gwyllt, gydag adroddiadau am anafiadau, ymddygiad gwrthgymdeithasol a thanau heb oruchwyliaeth.
“Efallai nad oes gan ein criwiau unrhyw ddewis ond gadael lleoliad os yw eu diogelwch personol yn cael ei beryglu, ac nid yw hyn o gymorth i unrhyw un, yn lleiaf oll y claf.
“Gall gweithred hollt-eiliad o drais gael effaith ddinistriol a hirdymor ar ein staff, yn gorfforol ac yn emosiynol, felly cofiwch weithio gyda ni, nid yn ein herbyn.
“Gadewch i ni wneud y Noson Tân Gwyllt hon yn achlysur cofiadwy a diogel drwy roi blaenoriaeth i’n llesiant ni a llesiant pobl eraill.
“Mwynhewch y dathliadau yn gyfrifol a mwynhewch Noson Tân Gwyllt.”