Canmol i gydweithwyr Gwasanaethau Ambiwlans Cymru am 'fil o flynyddoedd' o wasanaeth hir

BU Gwasanaeth Ambiwlans Cymru yn dathlu ei gydweithwyr a gwirfoddolwyr sydd wedi gwasanaethu ers tro mewn seremoni wobrwyo yn y de ar dydd Gwener.

Cyflwynwyd medalau i gydweithwyr gyda 20, 30 a 40 mlynedd o wasanaeth GIG mewn digwyddiad i gydnabod hyd eu gwasanaeth yng Nghanolfan Gynadledda Ryngwladol, Casnewydd ddydd Gwener.

Cyflwynwyd Medal Gwasanaeth Hir ac Ymddygiad Da hefyd i gydweithwyr sydd ag 20 mlynedd yn y Gwasanaeth Meddygol Brys gan Arglwydd Raglaw Gwent, y Brigadydd Robert Aitken CBE.

Yn rhyfeddol, roedd gan dderbynwyr dydd Gwener wasanaeth ar y cyd yn ymestyn dros 1,000 o flynyddoedd.

Ymhlith y derbynwyr yn y digwyddiad ddydd Gwener roedd Paul Greatorex, pennaeth gwasanaeth GIG 111 Cymru, a gafodd ei gydnabod am ei bedwar degawd anhygoel o wasanaeth.

Ymunodd Paul, a ddechreuodd ei yrfa yn Weston-Super-Mare yn wreiddiol, ag awdurdod Ambiwlans Avon ar y pryd ym 1981, yn ddim ond 22 oed.

Dechreuodd ei yrfa yn y gwasanaeth cludo cleifion cyn symud ymlaen i ddechrau ei hyfforddiant technegydd meddygol brys ym 1983.

Ym 1986, symudodd Paul i’r ystafell reoli fel swyddog rheoli ac yna fel uwcharolygydd ystafell reoli ac arhosodd gydag Awdurdod Ambiwlans Avon nes iddo ddod yn Wasanaeth Ambiwlans Great Western (GWAS) yn 2000.

Bu hefyd yn gweithio fel swyddog cyswllt ambiwlans yn Ysbyty Southmead Bryste cyn cael ei benodi i rôl cyfarwyddwr cynorthwyol gwasanaethau cludo cleifion yn GWAS ac yn ddiweddarach, gan ddod yn bennaeth perfformiad y gwasanaeth.

Arhosodd Paul gyda GWAS, a unodd yn ddiweddarach i fod yn Wasanaeth Ambiwlans y De Orllewin tan 2021, gan orffen ei gyfnod yno fel pennaeth ystafelloedd rheoli (gogledd).

Bu’n ystyried ymddeoliad yn fyr ond penderfynodd nad oedd yn addas iddo ac wedi hynny, ymunodd â Gwasanaeth Ambiwlans Cymru yn 2021 fel rheolwr gwasanaeth ac yna daeth yn bennaeth gwasanaeth dros dro i 111.

Dywedodd Paul, sy’n briod â Sarah ac yn rhannu pump o blant gyda hi: “Does gen i ddim cynlluniau o gwbl i ymddeol.

“Dw i wrth fy modd â’r hyn dwi’n ei wneud, a dwi’n gallu dweud wrthych o brofiad fod Gwasanaeth Ambiwlans Cymru yn sefydliad gwych i weithio iddo.

“Flwyddyn ar ôl i mi ymuno, profais i fraw iechyd ac roedd y gefnogaeth a gefais i a fy nheulu heb ei hail.

“Dwi’n benderfynol o aros gyda WAST ac i helpu i oruchwylio’r gwaith o drawsnewid y gwasanaeth 111.”

Mae bron i 300 o gydweithwyr ar draws yr Ymddiriedolaeth wedi cael gwahoddiad i dderbyn Gwobr Gwasanaeth Hir eleni.

Roedd cydweithwyr yn y digwyddiad ddoe yn cynnwys parafeddygon, technegwyr meddygol brys, trinwyr galwadau, dyranwyr, rheolwyr gweithrediadau ac ystod o gydweithwyr corfforaethol o bob rhan ledled de Cymru.

Dywedodd y Prif Weithredwr Jason Killens: “Mae gweithio i’r gwasanaeth ambiwlans yn cymryd math arbennig o berson.

“Mae’n swydd sy’n gwneud gwahaniaeth gwirioneddol gan ein bod yn tueddu i weld pobl dim ond pan fyddant yn ddifrifol wael neu’n dioddef argyfwng meddygol.

“Ein staff yw’r bobl y maen nhw’n troi atynt yn yr adegau hynny o angen, ac mae’n cymryd pobl ryfeddol i barhau i wneud yr hyn maen nhw’n yn ei wneud, o ddydd i ddydd.

“Mae yna gyfoeth o brofiad ymhlith ein pobl ac roedd yn ostyngedig i feddwl bod y Gwobrau Gwasanaeth Hir a gyflwynwyd gennym i’r bobl yn yr ystafell ddoe yn gyfystyr â gwasanaeth cyfunol o bron i fil o flynyddoedd.”

Ychwanegodd y Cadeirydd Colin Dennis: “Y bobl hyn yw’r rheswm pam mae Gwasanaeth Ambiwlans Cymru yr hyn ydyw.

“Maen nhw’n gweithio’n ddiflino, 24/7, i wasanaethu pobol Cymru, gan wneud gwahaniaeth enfawr i’w cymunedau.

“Rwy’n hynod falch o’u cyflawniadau a hoffwn longyfarch pob un o’n derbynwyr.”

Nodiadau gan y golygydd

I gael rhagor o wybodaeth, anfonwch neges e-bost at y Swyddog Cyfathrebu Jeff.Prescott@wales.nhs.uk neu ffoniwch Jeff ar 07811 748363.