Ennill gwobr ddwbl yng Ngwobrau GIG Cymru 2024

24.10.24

MAE Gwasanaeth Ambiwlans Cymru wedi’i goroni’n enillydd dwy Wobr GIG Cymru 2024.

Mae Gwobrau blynyddol GIG Cymru yn dathlu’r gwaith gwella ansawdd sydd wedi trawsnewid y profiad a’r canlyniadau i bobl yng Nghymru.

Mae hefyd yn gyfle i arddangos y staff iechyd a gofal dawnus yn cydweithio i wella gwasanaethau a gofal cleifion ledled Cymru.

Yn y seremoni heno (dydd Iau 24 Hydref 2024) yng Nghaerdydd, enillodd yr Ymddiriedolaeth wobr ddwbl ar gyfer dau brosiect gwella gwahanol.

Y prosiectau buddugol yw:

NHS Wales Effective Care Award: Cyflwyno meddyginiaeth lleddfu poen Penthrox

NHS Wales Safe Care Award : Rhaglen Cefnogi Diogelwch mewn Gofal Mamolaeth a Newyddenedigol

Dywedodd Jason Killens, Prif Weithredwr Gwasanaethau Ambiwlans Cymru: “Rydym yn hynod falch o fod yn mynd â nid dim ond un, ond dwy Wobr GIG Cymru tra chwenychedig adref.

“Mae lleddfu poen yn gyflym ac yn effeithiol i gleifion sydd wedi profi trawma yn rhan bwysig o’u gwneud yn fwy cyfforddus, felly roedd cyflwyno Penthrox i’n cyfres o gyffuriau lleddfu poen y llynedd wedi newid y gêm.

“Yn y cyfamser, mae ein hymdrechion i wella’r gofal yr ydym yn ei ddarparu i fabanod newydd-anedig o ran thermoreoli wedi bod yn ganmoladwy.

“Llongyfarchiadau i gydweithwyr ar fuddugoliaeth haeddiannol iawn.”

Ychwanegodd Judith Paget, Cyfarwyddwr Cyffredinol Iechyd, Gofal Cymdeithasol a’r Blynyddoedd Cynnar a Phrif Weithredwr GIG Cymru: “Llongyfarchiadau i’r enillwyr ond hefyd i bawb sydd wedi cyrraedd y rhestr fer ar gyfer gwobr heddiw.

“Mae Gwobrau GIG Cymru yn un o uchafbwyntiau fy mlwyddyn.

“Rwy’n falch iawn o weld lled y prosiectau gwella ansawdd sydd ar y gweill ar draws GIG Cymru i drawsnewid ein gwasanaethau i’r bobl rydym yn gofalu amdanynt.

“Gobeithio eich bod i gyd yn haeddiannol falch o’ch cyflawniadau yn y cyfnod heriol hwn.”

I ddarllen mwy am y cystadleuwyr a’r enillwyr eleni, ewch i: nhsawards.wales