Gwasanaeth Ambiwlans Cymru yn penodi Cyfarwyddwr Pobl newydd

11.09.24

MAE Gwasanaeth Ambiwlans Cymru wedi penodi Cyfarwyddwr Pobl newydd.

Bydd Carl Kneeshaw, Dirprwy Gyfarwyddwr Pobl yn Ymddiriedolaeth GIG Partneriaeth Iechyd Meddwl Avon a Wiltshire, yn ymuno â'r gwasanaeth ar 1 Tachwedd.

Yn y cyfamser, bydd Angela Lewis, Cyfarwyddwr Pobl a Diwylliant yr Ymddiriedolaeth ar hyn o bryd, yn symud i rôl newydd fel Cyfarwyddwr Newid Diwylliant am gyfnod penodol.

Mae gan Carl gyfoeth o brofiad ym maes rheoli adnoddau dynol strategol ac arweinyddiaeth sefydliadol ar ôl dal swyddi arwain uwch yng Ngwasanaeth Carchardai EF, y Weinyddiaeth Gyfiawnder a’r Adran Gwaith a Phensiynau.

Dywedodd Jason Killens, Prif Weithredwr Gwasanaeth Ambiwlans Cymru: “Gyda’i gefndir cryf mewn arwain sefydliadau hynod gymhleth, rheoli a chyflawni prosiectau trawsnewidiol ar raddfa fawr, mae gan Carl yr adnoddau iawn i arwain ein Gwasanaethau Pobl, Cynllunio’r Gweithlu, Addysg a Datblygiad a swyddogaethau Iechyd a Lles Galwedigaethol wrth i ni barhau ar ein taith tuag at ein gweledigaeth ar gyfer dyfodol WAST.

“Mae’r penodiad hwn yn rhan o benderfyniad strategol ehangach i sicrhau bod gennym y ffocws a’r arweinyddiaeth gywir yn eu lle i gefnogi ein pobl a’n nodau trawsnewid diwylliannol.

“Yn y cyfamser, yn ei rôl newydd fel Cyfarwyddwr Newid Diwylliant, bydd Angela yn canolbwyntio ar yrru ein hagenda trawsnewid diwylliannol uchelgeisiol yn ei blaen, symudiad sy’n adlewyrchu ein hymrwymiad i greu diwylliant sefydliadol cynhwysol, cefnogol a diogel.

“Mae hwn yn gyfnod cyffrous i WAST, a thros y ddwy flynedd nesaf, bydd Angela a Carl yn gweithio’n agos i sicrhau bod ein nodau pobl a diwylliannol yn cyd-fynd yn ddi-dor, a fydd yn y pen draw yn gwella ansawdd y gofal a’r gwasanaeth a ddarparwn.”

Am ei benodiad, dywedodd Carl: “Rwy’n teimlo’n freintiedig i fod yn ymuno â sefydliad sydd mor ymroddedig i’w bobl a’i gleifion.

“Yn fy rôl, bydd fy ffocws ar sicrhau bod cydweithwyr yn meddu ar y sgiliau a’r adnoddau sydd eu hangen arnynt, gan fuddsoddi yn ein pobl i greu sylfaen gref ar gyfer llwyddiant WAST yn y dyfodol.

“Rwy’n edrych ymlaen yn fawr at weithio gydag Angela yn ei rôl newydd fel Cyfarwyddwr Newid Diwylliant a chyfrannu at y daith drawsnewidiol y mae WAST arni.”

Nodyn gan y Golygydd

I gael rhagor o wybodaeth, anfonwch neges e-bost at y Pennaeth Cyfathrebu Lois.Hough@wales.nhs.uk