Parafeddyg Gwasanaeth Ambiwlans Cymru yn cael ei ddyfarnu fel Athro er Anrhydedd

22.08.24

MAE parafeddyg o Wasanaeth Ambiwlans Cymru wedi’i ddyfarnu fel Athro er Anrhydedd mewn prifysgol flaenllaw yn y byd.

Cafodd Nigel Rees, Cyfarwyddwr Cynorthwyol Ymchwil ac Arloesedd yr Ymddiriedolaeth, ei urddo'n Athro Anrhydeddus yn Uned Treialon Clinigol Ysgol Feddygol Prifysgol Warwick.

Rhoddir teitlau er anrhydedd gan brifysgolion i'r rhai sy'n gwneud cyfraniad sylweddol i fusnes academaidd, fel arfer trwy gydweithrediad ymchwil, addysgu clinigol neu'r ddau.

Dywedodd yr Athro Gavin Perkins, Deon Ysgol Feddygol Warwick: “Mae’n bleser gan Ysgol Feddygol Warwick groesawu’r Athro Nigel Rees i’w hathraw er anrhydedd. 

“Mae ei benodiad yn cydnabod ei gyfraniad sylweddol a pharhaus i ymchwil sydd wedi bod yn hanfodol wrth ddarparu’r dystiolaeth sydd ei hangen ar y GIG i drawsnewid gwasanaethau a gwella canlyniadau i gleifion a’u teuluoedd.  

“Rydym yn edrych ymlaen at gydweithrediad hirhoedlog gyda Nigel a Gwasanaeth Ambiwlans Cymru.”

Ymunodd yr Athro Rees â’r gwasanaeth ambiwlans ym 1989 fel cadét gyda Gwasanaeth Ambiwlans Powys, cyn symud ymlaen i Wasanaethau Gofal Cleifion ac yna dod yn Dechnegydd Meddygol Brys, gan weithio mewn lleoliadau amrywiol ar draws de Powys.

Dychwelodd i Ystradgynlais fel Parafeddyg ym 1993 a fe oedd Uwch Barafeddyg cyntaf Powys.

Gadawodd Wasanaeth Ambiwlans Cymru am gyfnod i ymuno â Bwrdd Iechyd Lleol Cwm Taf fel yr oedd ar y pryd fel Uwch Ymarferydd Brys o fewn tîm o Uwch Nyrsys Practis a Pharafeddygon a oedd y cyntaf o’i fath yng Nghymru.

Mae ei ddiddordebau ymchwil yn cynnwys treialon clinigol, ymchwil ansoddol, trais ac ymddygiad ymosodol tuag at staff ambiwlans a'r defnydd o dronau mewn gofal cyn ysbyty.

Mae’r Athro Rees wedi arwain a chyfrannu at fwy na 100 o erthyglau a adolygwyd gan gymheiriaid.

Mae’n Olygydd Cyswllt y cyfnodolyn Parafeddygaeth, ac yn aelod o lawer o baneli a grwpiau ariannu, gan gynnwys Comisiwn Bevan, Grŵp Arwain Ymchwil ac Arloesi GIG Cymru a’r Sefydliad Cenedlaethol dros Ymchwil Iechyd a Gofal.

Dros y blynyddoedd, mae’r Athro Rees wedi helpu i sicrhau cyllid gwerth £15 miliwn ar gyfer prosiectau ymchwil ac arloesi ac mae wedi bod yn Brif a Phrif Ymchwilydd ar nifer o dreialon ar raddfa fawr.

Mae’n gyn-aelod o Gyngor Cymru o Goleg y Parafeddygon ac yn Gymrawd.

Yn 2017, dyfarnwyd Medal Gwasanaeth Ambiwlans y Frenhines i’r Athro Rees yn Rhestr Anrhydeddau’r Flwyddyn Newydd am wasanaeth rhagorol.

Ychwanegodd yr Athro Kieran Walshe, Cyfarwyddwr Ymchwil Iechyd a Gofal Cymru, y mae Nigel yn Brif Ymchwilydd iddo: “Rydym wrth ein bodd bod Nigel wedi cael ei gydnabod am ei gyfraniad a’i ymrwymiad i ymchwil dros nifer o flynyddoedd.

“Rydym yn falch o’i gefnogi, fel ymchwilydd, ond hefyd yn y rôl arweiniol sydd ganddo yng Nghymru fel Arweinydd Ymchwil a Datblygu yn WAST.”

Dywedodd yr Athro Rees: “Hoffwn ddiolch i Brifysgol Warwick, fy holl gydweithwyr yn WAST, a phobl Cymru a thu hwnt sy’n parhau i gefnogi ymchwil ac sy’n cael eu hadlewyrchu yn yr anrhydedd hwn.”

Ym mis Ebrill, dyfarnwyd statws Ymddiriedolaeth Brifysgoli Wasanaeth Ambiwlans Cymru gan Lywodraeth Cymru i gydnabod ei hymrwymiad i ddatblygu ei weithlu presennol ac yn y dyfodol ac i ysgogi ymchwil ac arloesi.