Arweinydd Gwasanaeth Ambiwlans Cymru ymhlith yr enillwyr yng Ngwobrau Arloeswyr Diwylliant 2025

24.10.2025

MAE arweinydd Gwasanaeth Ambiwlans Cymru wedi cael ei chydnabod gyda Gwobr Arweinydd Pobl yng Ngwobrau Arloeswyr Diwylliant eleni (Culture Pioneer Awards).

Derbyniodd Angie Lewis, Cyfarwyddwr Newid yr Ymddiriedolaeth, y wobr am ei harweinyddiaeth wrth helpu’r sefydliad cryfhau ei ddiwylliant trwy ganolbwyntio ar onestrwydd, tosturi a dysgu parhaus ar draws y gwasanaeth.

Mae Gwobrau Arloeswyr Diwylliant yn dathlu arweinwyr sy’n llunio gweithleoedd cynaliadwy, sy’n canolbwyntio ar bobl, sy’n fuddiol i gydweithwyr a’r cymunedau maen nhw’n eu gwasanaethu.

Wrth gyhoeddi’r enillydd, fe wnaeth y trefnwyr ganmol Angie am ei dull arwain tosturiol a seiliedig ar werthoedd mewn amgylchedd lle mae gwaith tîm, ymddiriedaeth a lles yn hanfodol i ddarparu gofal diogel o ansawdd uchel.

Trwy ei gwaith, mae Angie wedi annog diwylliant lle mae cydweithwyr yn teimlo eu bod wedi’u grymuso i godi llais, rhannu syniadau a llunio newid cadarnhaol.

Mae hyn yn cynnwys mentrau fel y Rhwydwaith Lleisiau, adeiladu cymuned hyrwyddwyr diwylliant ffyniannus, yn ogystal â gwaith parhaus i ymgorffori egwyddorion diogelwch seicolegol, rheoli newid effeithiol, cynhwysiant a dysgu.

Wrth fyfyrio ar y wobr, dywedodd Angie: “Mae’n fraint derbyn y gydnabyddiaeth hon ond mae’n perthyn i bawb yn WAST sy’n cyfrannu at wneud ein sefydliad yn lle gwych i weithio.

“Mae newid diwylliant yn daith barhaus.

“Rydym yn falch o’r cynnydd rydym wedi’i wneud o ran gwrando, dysgu a chryfhau ymddiriedaeth a byddwn yn parhau i feithrin hynny, fel bod pob cydweithiwr yn teimlo eu bod yn gallu dod i’r gwaith fel nhw eu hunain a darparu’r gofal gorau posibl i’n cymunedau.”

Dywedodd Emma Wood, Prif Weithredwr Gwasanaeth Ambiwlans Cymru: “Mae Angie wedi bod yn allweddol wrth ein helpu i esblygu ein diwylliant.

“Mae ei hangerdd, ei empathi a’i hymrwymiad i’n pobl yn glir i bawb eu gweld ac mae hi wedi bod yn ffigur allweddol wrth gefnogi cydweithwyr i deimlo eu bod yn cael eu clywed, eu gwerthfawrogi a’u parchu.

“Mae’n hyfryd gweld Angie yn cael ei chydnabod am y gwaith gwych y mae wedi’i wneud, a gwn nad fi yw’r unig un sy’n dweud bod hon yn wobr haeddiannol iawn. 

“Mae’r wobr hon hefyd yn adlewyrchu’r ymdrech a rennir ar draws y Gwasanaeth sydd wedi ymrwymo i adeiladu gweithle cefnogol, agored a thosturiol.”