Gwasanaeth Ambiwlans Cymru yn dathlu cydweithwyr ledled Cymru am eu gwasanaeth hir

07.10.2025

Mae Gwasanaeth Ambiwlans Cymru wedi dathlu ei staff a'i wirfoddolwyr ar eu gwasanaeth hir mewn seremonïau gwobrwyo ledled Cymru.

Cyflwynwyd medalau i gydweithwyr sydd â 20, 30 a 40 mlynedd o wasanaeth mewn digwyddiadau yng ngogledd, de a chanolbarth Cymru i gydnabod hyd eu gwasanaeth.

Ymhlith y rhai a mynychodd y digwyddiadau roedd parafeddygon, technegwyr meddygol brys, trinwyr galwadau, dyrannwyr a chydweithwyr corfforaethol o bob cwr o'r wlad.

Cyflwynwyd Medal Gwasanaeth Hir ac Ymddygiad Da hefyd i'r rhai a oedd â 20 mlynedd o wasanaeth, yn benodol yn y Gwasanaeth Meddygol Brys.

Yn y seremoni gyntaf yn Llandudno, ymunodd Uchel Siryf Clwyd, Julie Gillbanks, ynghyd ag Arglwydd Raglaw Gwynedd, Edmund Bailey, â'r derbynwyr ar y llwyfan.

Ymhlith y rhai a gydnabuwyd yng ngogledd Cymru roedd y Rheolwr Gweithrediadau Carey Jones, sydd wedi cronni 40 mlynedd anhygoel o wasanaeth, ar ôl dechrau ei yrfa ym 1984 gyda Gwasanaeth Ambiwlans Gwynedd, ei enw ar y pryd.

Dydy Carey, 63, sy'n byw gyda'i wraig Karen a’i dri mab ym Mlaenau Ffestiniog, ddim yn barod i ymddeol eto ac felly yn lle hynny mae wedi dewis lleihau ei lwyth gwaith, gan ymrwymo i ddwy sifft yr wythnos.

Dywedodd Carey, sydd hefyd yn ffotograffydd ac yn bysgotwr brwd: ​​“Rydw i wedi gweld y gwasanaeth ambiwlans yn esblygu cymaint dros y pedwar degawd diwethaf, gan fynd o wasanaeth rhanbarthol yn y 1980au yr holl ffordd i'r gwasanaeth cenedlaethol ydyw heddiw.

“Heddiw, rydym yn wasanaeth modern sy'n darparu ystod llawer ehangach o wasanaethau a chymorth clinigol i bobl Cymru ac rwy'n falch o fod yn rhan o'r trawsnewidiad hwnnw.”

Yn y cyfamser, yn y seremoni yng Nghasnewydd yn ne Cymru, cafodd yr Arweinydd Clinigol Rhanbarthol Mike Jenkins ei gyflwyno â gwobr yn cydbanod ei 40 mlynedd o wasanaeth gan Arglwydd Ragalw Gwent, y Brigadydd Robert Aitken.

Ymunodd Mike, 64, sy'n byw yn Rhiwbeina gyda'i wraig, Alison, â’r Gwasanaeth Ambiwlans De Morganwg fel oedd yr enw ar y pryd, ym mis Mai 1984.

Yn ystod gyrfa hir, roedd Mike ymhlith y cyntaf yn y DU i gymhwyso fel Ymarferydd Parafeddyg Uwch yn 2006.

Y llynedd, dyfarnwyd Medal Gwasanaeth Ambiwlans y Brenin fawreddog i Mike hefyd am wasanaeth nodedig.

Gan edrych yn ôl dros ei fwy na phedair degawd o wasanaeth, dywedodd Mike: “Mae gen i gymaint o atgofion hyfryd ac rydw i wedi cwrdd â chymaint o bobl wych yn ystod fy ngyrfa.

“Mae Gwasanaeth Ambiwlans Cymru wedi bod yn lle gwych i weithio ond yr hyn sy'n ei wneud yn arbennig yw'r ffordd rydyn ni i gyd yn gofalu am ein gilydd.

“Ni waeth beth sy'n digwydd, mae yna bob amser rywun sy'n hapus i roi help llaw neu ddarparu cefnogaeth.”

Mae Mike bellach wedi canolbwyntio ar ymddeol ac mae'n bwriadu lleihau ei fywyd yn araf dros y flwyddyn neu ddwy nesaf, gan anelu at ymddeol yn y pen draw yn 2027 i ganolbwyntio'n llawn amser ar ei deulu, golff a'i gariad at gychod a physgota.

Yn y drydedd seremoni olaf a gynhaliwyd yng Ngwbert, derbyniodd Ymgynghorydd Nyrsio Gorllewin Cymru, Phillipa Downing, wobr i gydnabod ei 45 mlynedd o wasanaeth o fewn y GIG.

Dechreuodd Phillipa, 63, sy'n byw ym Mhontarddulais gyda'i gŵr, Rob, ei gyrfa yn 18 oed.

Dechreuodd Phillipa ei gyrfa mewn gofal cardiaidd, yn Ysbyty Cenedlaethol y Galon yn Llundain cyn dychwelyd i Gymru lle treuliodd wyth mlynedd fel Prif Nyrs yn yr Uned Gofal Cardiaidd yn Ysbyty Tywysoges Cymru ym Mhen-y-bont ar Ogwr.

Yn ddiweddarach daeth yn nyrs Ward cyn symud ymlaen i Galw Iechyd Cymru, a ddaeth yn ddiweddarach yn GIG 111 Cymru .

Wrth edrych yn ôl dros yrfa sydd wedi ymestyn dros bum degawd, dywedodd Philippa: “Rwy’n colli’r rhyngweithio wyneb yn wyneb â chleifion ac mewn sawl ffordd, mae’n rôl llawer mwy heriol o ateb galwadau fel Cynghorydd Nyrsio gan mai dim ond ar y wybodaeth rwy’n ei chael dros y ffôn y gallaf fynd.

“Fodd bynnag, mae’r hyfforddiant, yn enwedig o amgylch iechyd meddwl, wedi bod yn wych ac rwy’n dal i fwynhau’r hyn rwy’n ei wneud yn fawr iawn.

“Does gen i ddim cynlluniau pendant i ymddeol eto gan fy mod i’n mwynhau’r hyn rwy’n ei wneud ac yn teimlo fy mod i’n dal i gyfrannu.

“Os byddaf byth yn teimlo’n wahanol, byddaf yn gwybod ei bod hi’n bryd ymddeol - ond nid nawr yw’r amser hwnnw.”

Dywedodd y Prif Weithredwr, Emma Wood: "Yn aml, mae pobl yn troi atom ni yn ystod eu cyfnodau anoddaf, pan maen nhw'n ofnus, wedi'u hanafu, yn agored i niwed, neu'n sâl.

“Nid dim ond swydd arall yw gweithio yn y gwasanaeth ambiwlans; mae'n rôl sy'n newid bywydau go iawn.

“Mae’n anhygoel clywed bod y Gwobrau Gwasanaeth Hir a gyflwynwyd gennym yn y tair seremoni ledled Cymru yn cynrychioli mwy na 3,500 o flynyddoedd o wasanaeth ac ymroddiad cyfun.

"Hoffwn gynnig fy llongyfarchiadau diffuant i bob derbynnydd ac rwy'n falch iawn o bopeth maen nhw wedi'i gyflawni."

Derbyniodd bron i 150 o gydweithwyr ar draws yr Ymddiriedolaeth Wobr Gwasanaeth Hir eleni.

Roedd y rhain yn cynnwys deg aelod o staff a oedd wedi cronni 40 mlynedd anhygoel o wasanaeth, gyda 35 o unigolion eraill yn cronni 30 mlynedd o wasanaeth yr un.

Ychwanegodd y Cadeirydd Colin Dennis: "Pan gyflwynwyd y Gwobrau Gwasanaeth Hir gyntaf, roeddent yn nodi cyflawniad uchelgais hirhoedlog i anrhydeddu a dathlu ymroddiad ac ymrwymiad ein pobl mewn ffordd sy'n wirioneddol deilwng o'r achlysur.

“Mae’n gyfle i fyfyrio ar gyfraniadau rhyfeddol cydweithwyr o bob cwr o Gymru.

“Calon Gwasanaeth Ambiwlans Cymru yw ei bobl - y rhai sy’n gweithio’n ddiflino, ddydd a nos, drwy gydol y flwyddyn, i wasanaethu cymunedau Cymru.

“Fy llongyfarchiadau cynhesaf i bob un o’n derbynwyr, a fy niolch dwysaf am bopeth rydych chi wedi’i roi i Wasanaeth Ambiwlans Cymru.”