Gwasanaeth Ambiwlans Cymru yn Penodi Prif Weithredwr Newydd

Mae Ymddiriedolaeth Brifysgol GIG Gwasanaethau Ambiwlans Cymru yn falch o gyhoeddi penodiad Emma Wood yn Brif Weithredwr newydd.

Mae Emma yn ymuno â'r Ymddiriedolaeth o Ymddiriedolaeth Sefydledig y GIG Ysbytai Prifysgol Bryste a Weston, lle mae hi wedi gwasanaethu fel Prif Swyddog Pobl a Dirprwy Brif Swyddog Gweithredol.

Gyda bron i ddau ddegawd o brofiad fel Cyfarwyddwr Bwrdd ar draws y sectorau cyhoeddus a phreifat, mae gan Emma hanes cryf o arweinyddiaeth, gan gynnwys rolau uwch blaenorol o fewn y GIG a'r gwasanaethau brys.

Wrth fyfyrio ar ei phenodiad, dywedodd Emma: “Mae’n anrhydedd wirioneddol ymuno â Gwasanaeth Ambiwlans Cymru ar adeg mor allweddol yn ei daith.

“Mae’r sefydliad eisoes wedi cyflawni cynnydd sylweddol wrth drawsnewid ei wasanaethau, ac rwy’n gyffrous i adeiladu ar y sylfaen gref honno.

“Mae cyfle gwirioneddol o’n blaenau i barhau i arloesi, i gryfhau ansawdd y gofal a ddarparwn, ac i wneud effaith gadarnhaol barhaol ar bobl ledled Cymru.

“Rwy’n angerddol am greu amgylchedd gwaith lle mae ein timau’n ffynnu ac rwy’n gwbl ymrwymedig i wella profiad cydweithwyr fel prif ysgogydd gofal cleifion rhagorol.

“Rwy’n teimlo’n gyffrous ac mae’n fraint i fod yn ymgymryd â’r rôl hon ac i wasanaethu cymunedau ledled Cymru.

“Rwy’n edrych ymlaen at weithio ochr yn ochr â chydweithwyr, partneriaid a rhanddeiliaid i lunio’r bennod nesaf i’r Ymddiriedolaeth.”

Croesawodd Cadeirydd yr Ymddiriedolaeth, Colin Dennis, y penodiad, gan ddweud: “Rydym wrth ein bodd yn croesawu Emma i’r sefydliad yn dilyn proses recriwtio gystadleuol iawn.

“Mae safon yr ymgeiswyr yn adlewyrchu enw da cenedlaethol cynyddol Gwasanaeth Ambiwlans Cymru, ac roedd Emma yn sefyll allan fel ymgeisydd eithriadol.

“Mae hi’n dod â chyfoeth o brofiad arweinyddiaeth ac angerdd clir dros bobl a gwella gwasanaethau.

“Mae’r Bwrdd yn hyderus y bydd arbenigedd, gwerthoedd ac arddull arweinyddiaeth gynhwysol Emma yn helpu i yrru’r sefydliad ymlaen a chyfrannu at welliannau ehangach ar draws GIG Cymru.

“Rydym yn edrych ymlaen at weithio gyda hi.”

Bydd Emma yn dechrau yn ei rôl newydd yn ffurfiol ddechrau mis Hydref.

Nodiadau gan y golygydd:

Am ragor o wybodaeth, anfonwch neges e-bost at y Pennaeth Cyfathrebu rachel.taylor16@wales.nhs.uk