Gwasanaeth Ambiwlans Cymru yn datgelu addewidion newydd i amddiffyn cenedlaethau'r dyfodol

31.03.25

MAE Gwasanaeth Ambiwlans Cymru wedi gwneud cyfres o addewidion i ddiogelu llesiant cenedlaethau’r dyfodol.

Mae amcanion llesiant yr Ymddiriedolaeth, a gyhoeddwyd fel rhan o’i dyletswyddau o dan Ddeddf Llesiant Cenedlaethau’r Dyfodol (Cymru) 2015, yn atgyfnerthu ei hymrwymiad i staff, cleifion a chymunedau ledled Cymru.

Nod y Ddeddf yw sicrhau bod cyrff cyhoeddus ledled Cymru yn cydweithio i wella llesiant cymdeithasol, economaidd, amgylcheddol a diwylliannol Cymru.

Dywedodd Estelle Hitchon, Cyfarwyddwr Partneriaethau ac Ymgysylltu’r Ymddiriedolaeth: “Mae ein hamcanion yn cynrychioli ein hymrwymiad hirdymor i ddarparu gofal rhagorol tra’n bod yn gyflogwr blaengar, cymdeithasol gyfrifol.

“Rydym am adeiladu gwasanaeth sy’n addas ar gyfer y dyfodol – un sy’n cefnogi ein pobl, yn gwarchod ein hamgylchedd, ac yn diwallu anghenion y cymunedau amrywiol rydym yn eu gwasanaethu.”

Mae’r amcanion newydd yn canolbwyntio ar dri maes blaenoriaeth:

Cyflogwr cymdeithasol gyfrifol a chynhwysol, drwy wneud y canlynol:

• cefnogi cymunedau a'r economi drwy ddarparu cyflogaeth hirdymor a chyfleoedd gwirfoddoli i bobl sy'n byw ledled Cymru, ar bob adeg yn eu gyrfa ac mewn amrywiaeth eang o rolau.
• parhau i ddatblygu gweithlu amrywiol sydd wedi'i hyfforddi'n arbenigol fel bod cymunedau'n teimlo eu bod yn cael eu cefnogi'n dda ac yn ymgysylltu â'r sefydliad.
• bod yn gyflogwr cynhwysol, gan adlewyrchu'r cymunedau y mae'n eu gwasanaethu ledled Cymru.
• gwerthfawrogi partneriaethau ag Undebau Llafur a gweithio mewn partneriaeth i greu sefydliad sy'n groesawgar, yn deg a lle gall pobl ffynnu.

Sefydliad arloesol a chynaliadwy, drwy wneud y canlynol:

• bod ar flaen y gad ym maes gofal clinigol drwy harneisio technoleg mewn ffordd sy’n lleihau effaith amgylcheddol ac sy’n gwella diogelwch a phrofiad cleifion.
• gwneud y gorau o Statws Ymddiriedolaeth Prifysgol i weithio gyda phartneriaid masnachol ac academaidd i chwilio am atebion yfory, heddiw.
• parhau i leihau ei effaith amgylcheddol, gan ddefnyddio datrysiadau mwy cynaliadwy a charbon niwtral yn ei ystad, fflyd ac arferion gwaith, i sicrhau ei fod yn cyfrannu at Gymru wyrddach, lanach ac iachach.
• rheoli ei asedau ariannol a ffisegol yn dda, fel y gall ddarparu gwasanaethau hyfyw ar gyfer y tymor hir ac fel y gall cymunedau ddibynnu ar y sefydliad i fod yno pan fydd ei angen arnynt.

Darparwr gofal rhagweithiol, hygyrch a theg, drwy wneud y canlynol:

• darparu gwasanaethau brys a gofal brys sy'n diwallu anghenion pobl Cymru, lle bynnag a phryd bynnag y mae eu hangen, gan wella canlyniadau a sicrhau y gall pobl fyw bywydau iachach am gyfnod hwy.
• gwella gwasanaethau a pherfformiad yn barhaus, fel bod gan bobl Cymru ymddiriedaeth a hyder yn ei gallu i fod yno pan fydd ei hangen arnynt fwyaf.
• cydgynhyrchu modelau gofal ar y cyd â chymunedau a phartneriaid sy'n parhau i ddiwallu anghenion esblygol pobl Cymru ac yn adlewyrchu'r hyn sy'n bwysig iddynt.
• helpu i wneud Cymru'n genedl sy'n achub bywydau drwy gefnogi addysg iechyd a hybu sgiliau CPR gwylwyr, gan wella cydnerthedd cymunedol.
• cofleidio ei rôl ddiwylliannol fel gwasanaeth ambiwlans cenedlaethol Cymru, gan hyrwyddo ei hiaith a’i threftadaeth tra’n datblygu ffyrdd arloesol newydd o ddarparu gofal sy’n gosod Cymru fel arweinydd ar y llwyfan cenedlaethol a rhyngwladol.

Mae Deddf Llesiant Cenedlaethau’r Dyfodol wedi bod yn berthnasol i Wasanaethau Ambiwlans Cymru ers 30 Mehefin 2024.

Ychwanegodd Estelle: “Nod y Ddeddf yw sicrhau bod cyrff cyhoeddus yn cydweithio i sicrhau bod Cymru’n datblygu fel gwlad lewyrchus, gyfoethog yn ddiwylliannol, economaidd fywiog, iach ac addysgedig, lle gall pobl ffynnu yn y gwaith a chartref.

“Bydd yr amcanion hyn yn llywio penderfyniadau’r Ymddiriedolaeth, gan helpu i lunio polisïau a mentrau sy’n blaenoriaethu cynaliadwyedd, cynhwysiant a llesiant.

“Hoffem ddiolch i bawb sydd wedi helpu i lunio’r amcanion dros y misoedd diwethaf; o’r cydweithwyr a’r partneriaid Undebau Llafur a’u datblygodd, i’r rhanddeiliaid ac aelodau’r cyhoedd a gefnogodd y broses ymgysylltu ehangach.”

I ddysgu mwy am amcanion llesiant yr Ymddiriedolaeth, ewch i: Our Wellbeing Objectives: Focused on the Future