Elusen Gwasanaeth Ambiwlans Cymru yn derbyn hwb o £142,000 i helpu i wella cyfraddau goroesi yng Nghymru

04.11.2025

Mae Elusen Gwasanaeth Ambiwlans Cymru wedi derbyn grant o £142,000 i helpu i wella cyfraddau goroesi ar gyfer ataliadau’r galon y tu allan i'r ysbyty.

Mae Elusen Gwasanaeth Ambiwlans Cymru yn un o 14 o elusennau'r GIG yn y DU i dderbyn cyllid gan NHS Charities Together, trwy ei Chronfa Grantiau Gwydnwch Cymunedol gwerth £1.94m, mewn partneriaeth ag Omaze.

Gan weithio gyda 14 o elusennau ambiwlans y GIG ledled y wlad, mae'r gronfa wedi'i chynllunio i helpu mwy o bobl i ennill yr wybodaeth, y sgiliau a'r hyder i ymateb mewn argyfwng.

Ar hyn o bryd, bydd llai na 10% o bobl sy'n dioddef ataliad y galon y tu allan i'r ysbyty yn dychwelyd adref at eu teuluoedd.

Fodd bynnag, trwy weithredu’n gyflym ac adnabod yn gynnar, gall CPR a diffibrilio gynyddu’r siawns o oroesi i fwy na phump allan o bob 10 (50%).

Bydd yr arian a ddyfarnwyd gan NHS Charities Together yn caniatáu i Elusen Gwasanaeth Ambiwlans Cymru ddefnyddio data i wella'r gadwyn oroesi, ac i gefnogi gwirfoddolwyr i ddysgu sgiliau achub bywyd yn eu cymunedau lleol.

Dywedodd David Hopkins, Pennaeth yr Elusen yn Elusen Gwasanaeth Ambiwlans Cymru: “Rydym yn hynod ddiolchgar i NHS Charities Together am eu cefnogaeth a’u cyllid.

“Nod ein prosiect newydd yw cryfhau’r gadwyn oroesi ledled Cymru, gan weithio gyda’n cydweithwyr yng Ngwasanaeth Ambiwlans Cymru i wella hyder CPR gwylwyr, a chynyddu mynediad at ddiffibrilwyr.

“Bydd y prosiect hwn yn ein galluogi i roi’r sgiliau, yr hyder a’r gefnogaeth leol sydd eu hangen ar fwy o bobl i achub bywydau mewn argyfwng cardiaidd.”

Ychwanegodd Jon Goodwin, Pennaeth Grantiau yn NHS Charities Together: “Rydym wrth ein bodd yn dyfarnu’r grant hwn i Elusen Gwasanaeth Ambiwlans Cymru fel rhan o’n Cronfa Grantiau Gwydnwch Cymunedol.

“Mae gan y prosiect y potensial i wneud gwahaniaeth enfawr i bobl sy’n byw yng Nghymru drwy eu helpu i adnabod arwyddion cynnar argyfwng sy’n peryglu bywyd a sut i ymateb.”

“Yn ogystal â helpu i wella’r siawns o oroesi, drwy addysgu pobl i wybod sut i ymateb mewn argyfwng iechyd – neu hyd yn oed ei atal rhag digwydd yn y lle cyntaf – gallwn helpu i leihau’r pwysau ar y GIG, sydd erioed wedi bod yn bwysicach.

“Edrychwn ymlaen at barhau â’n gwaith gydag Elusen Gwasanaeth Ambiwlans Cymru a sefydliadau eraill ledled y DU i helpu’r GIG i fynd ymhellach i bawb.”