Mae gwefan GIG 111 Cymru yn datgelu cynorthwyydd rhithwir newydd sy'n cael ei bweru gan ddeallusrwydd artiffisial

16.07.25

MAE GIG 111 Cymru wedi cyflwyno cynorthwyydd rhithwir newydd i helpu defnyddwyr y wefan i gael y cyngor iechyd cywir, yn gyflym.

Mae'r cynorthwyydd sy'n cael ei bweru gan deallusrwydd artiffisial, sydd ar gael mewn sawl iaith, yn sganio'r wefan am wybodaeth a chyngor yn seiliedig ar sylwadau gan y claf.

Mae'r dechnoleg wedi'i chynllunio i gynnig profiad cyflymach a mwy di-dor i ddefnyddwyr ac mae'n rhan o raglen waith ehangach i wella gwefan GIG 111 Cymru.

Dywedodd Jonny Sammut, Cyfarwyddwr Gwasanaethau Digidol yng Ngwasanaeth Ambiwlans Cymru, sy'n cynnal gwasanaeth GIG 111 Cymru: “Mae 111 yn ymfalchïo mewn darparu cyngor gofal iechyd y gallwch ymddiried ynddo, a dyna pam mae gwella ein cynnig digidol yn ddarn o waith sydd byth yn dod i ben.

“Rydym hefyd yn cydnabod bod yna lawer iawn o wybodaeth ar wefan 111 a all fod yn anodd ei defnyddio, yn enwedig pan fyddwch chi'n teimlo'n sâl.

“Mae’r cynorthwyydd rhithwir yn eich helpu i ddod o hyd i atebion drwy sganio’r wefan i chi, boed hynny’n ymwneud â brech, pigiad, twymyn, poen dannedd – neu beth bynnag sy’n gwneud i chi deimlo’n sâl.

“Mae’r mynediad amser real hwn at gyngor iechyd nid yn unig yn cynnig profiad mwy cyfeillgar i’r defnyddiwr ond mae hefyd yn galluogi pobl i wneud penderfyniadau mwy gwybodus am eu hiechyd.

“Yr allwedd i’w lwyddiant yw adborth gan y cyhoedd, felly byddem yn annog unrhyw un sy’n defnyddio’r cynorthwyydd rhithwir i roi eiliad i ni ar ôl defnyddio’r cynorthwyydd i ddweud wrthym beth oeddent yn ei feddwl.”

Partnerodd yr Ymddiriedolaeth â Robotics AI a DRUID AI i adeiladu'r cynorthwyydd rhithwir.

Dywedodd Raj Sharma, Is-lywydd Gwerthiannau UKI yn DRUID AI: “Yn DRUID AI, rydym yn falch o gydweithio â Gwasanaeth Ambiwlans Cymru a Robotics AI i chwyldroi rhyngweithiadau cleifion â gwasanaeth GIG 111 Cymru.

“Mae ein hasiant sy’n cael ei yrru gan ddeallsrwydd artiffisial wedi’i gynllunio i wella profiad cleifion, gan sicrhau bod unigolion yn derbyn gwybodaeth iechyd amser real mewn modd di-dor a hawdd ei ddeall a’i ddefnyddio.

“Mae’r datrysiad hwn, sy’n cael ei bweru gan ddeallusrwydd artiffisial, nid yn unig yn gwella profiad y claf drwy ddarparu rhyngweithiadau amserol a phersonol, ond mae hefyd yn gwella effeithlonrwydd gweithredol drwy leddfu’r pwysau ar ganolfannau galwadau.”

Ychwanegodd Russell Lawrie, Prif Weithredwr Robotics AI: “Rydym wrth ein bodd yn partneru â WAST a DRUID AI i ddarparu datrysiad trawsnewidiol sydd nid yn unig yn gwella mynediad at wybodaeth gofal iechyd ond sydd hefyd yn cefnogi cenhadaeth WAST i ddarparu gofal teg ac effeithlon i boblogaeth Cymru.

“Mae’r ateb hwn yn gam sylweddol ymlaen o ran gwneud gofal iechyd yn fwy cynhwysol, hygyrch ac ymatebol.”

Rhannwch eich profiad o wasanaeth GIG 111 Cymru yn ehangach drwy ymweld â: GIG 111 Cymru