Neges gŵyl y banc ddechrau mis Mai gan Wasanaeth Ambiwlans Cymru

28.04.26

Mae Gwasanaeth Ambiwlans Cymru yn gofyn i'r cyhoedd aros yn ddiogel a defnyddio 999 yn gyfrifol dros gyfnod gŵyl y banc ddechrau mis Mai.

Mae data'n dangos, yn ystod yr un cyfnod gŵyl banc y llynedd, fod yr Ymddiriedolaeth wedi gweld cynnydd o 13% mewn galwadau i GIG 111 Cymru o'i gymharu â'r wythnos flaenorol.

Dywedodd Jonathan Edwards, Cyfarwyddwr Cynorthwyol Gweithrediadau yng Ngwasanaeth Ambiwlans Cymru: “Mae penwythnosau gŵyl y banc bob amser yn gyfnod prysur iawn i ni, gan roi mwy o bwysau ar ein hadnoddau.

“Mae gennym ni i gyd ran i'w chwarae wrth sicrhau ein bod ni'n diogelu’r adnoddau hynny i'r bobl sydd eu hangen fwyaf, felly gweithredwch yn gyfrifol a helpwch ni eich helpu chi.

“Cofiwch mai ar gyfer argyfyngau yn unig y mae 999, felly os nad yw'n argyfwng ond bod angen cymorth meddygol sicrwydd arnoch chi, dylai gwefan GIG 111 Cymru fod yn fan galw cyntaf i gael cyngor, gwybodaeth a'r camau nesaf.”

Er mwyn helpu i sicrhau bod adnoddau'n cael eu defnyddio'n effeithiol, mae'r Ymddiriedolaeth yn gofyn i bobl gymryd y rhagofalon canlynol i gadw eu hunain yn iach –

• Os ydych chi'n sâl neu os oes gennych chi anaf bach, gallwch ymweld â gwefan GIG 111 Cymru neu roi cynnig ar Albot - Cynorthwyydd Digidol GIG Cymru, a all eich helpu i ddod o hyd i atebion i'r rhan fwyaf o gwestiynau a chael mynediad at y gofal cywir, yn y lle iawn, ar yr amser iawn.
• Stociwch eich meddyginiaethau presgripsiwn cyn y penwythnos tridiau pan fydd meddygfeydd teulu ar gau.
• Yfwch alcohol yn gymedrol, gan fwyta cyn yfed a newid diodydd alcoholaidd a diodydd meddal bob yn ail.
• Trefnwch eich cludiant adref ymlaen llaw a pheidiwch byth â gyrru dan ddylanwad alcohol na chyffuriau.
• Gwnewch yn siŵr bod gennych becyn cymorth cyntaf wedi'i stocio'n llawn i ofalu am fân anafiadau gartref, gan gynnwys meddyginiaethau ar gyfer anhwylderau cyffredin fel peswch, dolur gwddf a dolur rhydd.
• Cadwch lygad allan am deulu, ffrindiau a chymdogion sy'n arbennig o agored i niwed.
• Gall gwasanaethau fel fferyllfeydd lleol ac unedau mân anafiadau hefyd ddarparu cyngor a thriniaeth ar gyfer amrywiaeth o bryderon iechyd nad ydynt yn frys.

Mae'r Ymddiriedolaeth hefyd yn gofyn i'r cyhoedd drin gweithwyr brys â pharch.

Parhaodd Jonathan: “Ar adeg pan fydd llawer o bobl yn mwynhau’r penwythnos hir, ystyriwch y rhai sy’n gweithio’n galed i gadw pobl yn ddiogel a thriniwch ein gweithwyr ambiwlans gyda’r parch maen nhw’n ei haeddu.

“Er ein bod yn dymuno gŵyl banc bleserus i bawb, cofiwch fod gweithwyr brys yn fodau dynol normal sydd ond yn ceisio gwneud eu swydd.

“Maen nhw yno i’ch helpu chi, felly peidiwch â gwneud eu swyddi’n anoddach nag ydyn nhw eisoes trwy eu cam-drin mewn unrhyw ffordd.”