Gwasanaeth Ambiwlans Cymru i arwain astudiaeth gydweithredol ar benderfyniadau anfon brys trwy ymgynghoriad fideo

11.07.25

Bydd Gwasanaeth Ambiwlans Cymru yn arwain astudiaeth newydd i ddefnyddio ymgynghoriadau fideo byw i helpu gwneud penderfyniadau wrth anfon timau gofal critigol mewn ymateb i alwadau 999.

Mae'r prosiect yn gydweithrediad rhwng clinigwyr ac ymchwilwyr ar draws Gwasanaeth Ambiwlans Cymru, Gwasanaeth Ambiwlans Gorllewin Canolbarth Lloegr, Prifysgol Warwick, Prifysgol Bryste, Coleg Imperial Llundain, Prifysgol Aberystwyth, y Gwasanaeth Adalw a Throsglwyddo Meddygol Brys ac Elusen Ambiwlans Awyr Cymru.

Nod yr astudiaeth 999 RESPOND-2 yw gwella’r broses o wneud penderfyniadau ynghylch a ddylid anfon Timau Gofal Critigol Uwch i alwadau brys.

Mae'r timau arbenigol hyn yn darparu gofal uwch i gleifion sydd wedi'u hanafu'n ddifrifol yn lleoliad digwyddiad.

Nod yr ymchwil yw helpu gwasanaethau i wneud defnydd effeithlon o dimau gofal critigol ar draws y system gyfan, gan fod ECCTs yn adnodd gwerthfawr a chyfyngedig a fyddai fel arfer yn cael ei anfon i'r digwyddiadau mwyaf priodol yn unig.

Ar hyn o bryd, mae'n anodd i glinigwyr ystafell reoli gofnodi cymhlethdod a chyfaint y wybodaeth sydd ei hangen arnynt i wneud y penderfyniad gorau yn llawn.

Mae datblygiadau mewn technoleg wedi galluogi gwasanaethau ambiwlans i brofi fideo ffrydio byw o ffonau clyfar galwyr yn ystod galwad frys, i helpu staff ambiwlans i asesu'n gyflym ac yn gywir pa mor frys mae angen cymorth ar glaf sy'n sâl.

Dywedodd yr Athro Nigel Rees, Cyfarwyddwr Cynorthwyol Ymchwil ac Arloesi yng Ngwasanaeth Ambiwlans Cymru: “Rydym yn astudio sut mae timau gofal critigol brys yn mesur risg a difrifoldeb mewn sefyllfaoedd dan bwysau uchel ac amser-sensitif.

“Rydym yn gwneud hyn trwy gymharu galwadau ymgynghori fideo, lle gall clinigwyr weld y claf, lleoliad y ddamwain a ffactorau eraill yn hytrach na galwadau 999 traddodiadol, lle dim ond ar sail disgrifiadau gan y galwr y gall y clinigwr wneud penderfyniad.

“Rydym yn gobeithio dysgu mwy am bwy sy'n gweld beth, pwy sy'n dweud beth a sut mae'r penderfyniadau hyn yn siapio ymateb brys pan fydd eiliadau'n bwysig a gallant fod y gwahaniaeth rhwng bywyd a marwolaeth.

“O drawma mawr i argyfyngau meddygol difrifol, mae ECCTs yn hanfodol i wasanaethau cyn-ysbyty ac argyfwng, ond maent yn adnodd cyfyngedig.”

Yr astudiaeth yw'r gyntaf i ystyried effaith fideo ffrydio byw ar sut mae pobl yn cyfathrebu â'i gilydd mewn galwadau 999 ac i ddarparu tystiolaeth ynghylch a all fideos ffrydio byw oresgyn rhai cyfyngiadau galwadau sain 999.