Diogelwch y ffyrdd

Mae pob penderfyniad y tu ôl i'r llyw yn bwysig. I ddiogelu eich hun ac eraill:

Cadwch at derfynau cyflymder
Osgowch wrthdyniadau - cadwch eich llygaid ar y ffordd
Peidiwch byth ag yfed na gyrru dan ddylanwad cyffuriau
Gwisgwch eich gwregys diogelwch
Cynlluniwch ymlaen llaw ar gyfer tywydd gwael

Beth i'w wneud pan fydd cerbyd brys yn agosáu atoch chi

Mae ein timau wedi'u hyfforddi i basio modurwyr eraill yn ddiogel wrth yrru o dan amodau brys (ar oleuadau glas a seirenau). Ceisiwch beidio â chynhyrfu os bydd cerbyd brys yn agosáu atoch – ond cofiwch:

Os bydd cerbyd ambiwlans yn dod y tu ôl i chi gyda goleuadau glas a seirenau, tynnwch i'r chwith os oes lle diogel i wneud hynny.
Os nad oes lle diogel, yn hytrach na stopio ar unwaith, mae'n well parhau ar y terfyn cyflymder nes bod lle diogel i dynnu i mewn neu nes y gall y cerbyd ambiwlans fynd heibio chi yn ddiogel.
Os ydych chi'n agosáu at dro yn y ffordd neu ar ael bryn, tynnwch i'r ochr pan fydd golygfa well o'r ffordd o'ch blaen.
Os oes llinell wen solet, efallai bydd y cerbyd brys yn diffodd ei seiren wrth iddo eich dilyn. Mae hyn oherwydd nad yw cynllun y ffordd yn caniatáu goddiweddyd yn ddiogel. Daliwch ati i fynd ar y terfyn cyflymder.
Os yw'r lôn yn ddigon llydan a bod lle i'r cerbyd eich pasio, ceisiwch symud i'r chwith, ond heb fynd dros y llinell wen nac i lôn feiciau.
Ceisiwch osgoi tynnu i mewn i lonydd bysiau neu feiciau. Mae criw’r ambiwlans wedi’u hyfforddi i yrru mewn traffig trwm ac efallai y byddant yn ceisio defnyddio’r lôn fysiau i basio, a gallech fod yn eu ffordd neu hyd yn oed gael dirwy.
Peidiwch byth â mynd trwy oleuadau traffig coch gan y gallech gyflawni trosedd. Os yw'n ddiogel pasio, bydd yr ambiwlans yn gwneud hynny. Os nad yw’n ddiogel, byddant yn aros nes bod lle i basio mewn modd diogel.
Ar ffordd ddeuol neu draffordd, y peth gorau i'w wneud yw symud i'r chwith os yw'r traffig yn symud, pan mae'n ddiogel newid lonydd. Peidiwch â stopio yn y lôn dde. Os nad yw’r traffig yn symud, ystyriwch lwybr y cerbyd brys a gadael i'r cerbyd yrru i lawr canol y traffig.

Beth i'w wneud pan fydd cerbyd ambiwlans wedi'i barcio

Bydd ein criwiau'n gwneud popeth o fewn eu gallu i beidio â rhwystro cerbydau eraill wrth barcio ar ôl cyrraedd argyfwng. Fodd bynnag, eu blaenoriaeth yw cyrraedd y claf cyn gynted â phosibl.

Os gwelwch chi gerbyd ambiwlans wedi'i barcio, gwnewch y canlynol:

Peidiwch â blocio cerbyd ambiwlans gan y bydd hyn yn debygol o'u gohirio naill ai wrth fynd â chlaf i'r ysbyty neu wrth ymateb i alwad frys arall.
Peidiwch â pharcio'n rhy agos at gefn ambiwlans. Er mwyn dod â rhai cleifion i'r ambiwlans yn ddiogel, efallai y bydd angen i'r criwiau defnyddio'r lifft yng nghefn y cerbyd, ac efallai na fydd hyn yn bosibl os yw cerbyd arall wedi'i barcio'n rhy agos.

Beth i edrych allan amdano wrth barcio'ch cerbyd

Gall parcio heb ystyried eraill atal cerbydau brys rhag cyrraedd digwyddiadau difrifol a allai ohirio triniaeth i’r rhai sydd angen cymorth.

Mae Rheolau'r Ffordd Fawr yn datgan 'na ddylech stopio na pharcio yn unrhyw le y byddech yn atal mynediad i Wasanaethau Brys'.

Wrth barcio, ystyriwch y canlynol:

Peidiwch â pharcio o flaen pwyntiau mynediad gwasanaethau brys
Peidiwch â pharcio o flaen gorsafoedd ambiwlans
Ufuddhewch i Reolau'r Ffordd Fawr a marciau ffordd fel llinellau melyn a chyffyrdd bocs
Parciwch mor agos at y palmant â phosibl
Parciwch yn syth gyda'r olwynion yn syth a phlygwch y drychau i mewn
Mewn strydoedd cul, parciwch ar un och o’r ffordd yn unig, oni bai bod lleoedd parcio swyddogol
Peidiwch â pharcio'n rhy agos at gorneli na mesurau tawelu traffig
Gadewch le ychwanegol mewn cyffyrdd cyfyng
Peidiwch â stopio na pharcio gyferbyn â chyffordd neu o fewn 10 metr iddi, oni bai eich bod mewn lle parcio awdurdodedig.

Am ragor o wybodaeth, ewch i Blue Light Aware – adnodd addysgol a gynlluniwyd i helpu gyrwyr i gynorthwyo cerbydau brys yn ddiogel ar deithiau golau glas. Yn seiliedig ar ganllawiau Rheolau’r Ffordd Fawr, mae’n cynnwys fideos byr ac animeiddiadau a grëwyd ar ran gwasanaethau brys y DU.

Drwy ddefnyddio Blue Light Aware, byddwch yn deall anghenion gyrwyr brys yn well, yn lleihau risgiau ar y ffordd, ac yn helpu i greu amgylchedd gyrru mwy diogel i bawb.