Cyfarwyddwr Anweithredol ac Is-gadeirydd

Mae Ceri Jackson wedi dal nifer o rolau arweinyddiaeth uwch yn y trydydd sector. Roedd hi'n Gyfarwyddwr RNIB Cymru ac yn dal rolau cenedlaethol gydag RNIB, gan gynnwys Cyfarwyddwr a Phennaeth Cymuned.

Hi oedd Cyfarwyddwr Dros Dro Strategaeth a Thrawsnewid yn Nhŷ Hafan ac yn ystod y blynyddoedd diwethaf, mae wedi cynnal adolygiadau a gwerthusiadau o lywodraethu, strategaeth a darparu gwasanaethau ar gyfer amrywiaeth o sefydliadau trydydd sector.

Ymunodd Ceri â'r Ymddiriedolaeth fel Cyfarwyddwr Anweithredol ar 1 Ebrill 2021, fe'i penodwyd yn Is-gadeirydd Dros Dro ym mis Rhagfyr 2023 a daeth yn Is-gadeirydd parhaol ar 1 Gorffennaf 2024.

Mae hi wedi gwasanaethu ar nifer o fyrddau cynghori ledled Cymru, gan helpu i lunio polisi ac ymarfer ym maes iechyd, gofal cymdeithasol a thai. Mae ei phrofiad llywodraethu yn y trydydd sector yn cynnwys gwasanaethu am chwe blynedd fel Ymddiriedolwr Cymdeithas Strôc ac fel Cadeirydd ac Ymddiriedolwr Sefydliad Caerdydd i'r Deillion, sydd bellach yn Sight Life.

Wedi'i lleoli yng Nghaerdydd, mae Ceri yn dod â phrofiad helaeth mewn llywodraethu, datblygu sefydliadol, cydraddoldeb, amrywiaeth a chynhwysiant, ac ymgysylltu cymunedol, gydag ymrwymiad cryf i wella canlyniadau i bobl a chymunedau ledled Cymru.